He feito casamuda.

A nueba adreza d’o mio blog ye

http://www.ocucutenazierzera.blogspot.com/

Diz que l’unico poeta autentico ye lo polaco Hans Slovinski, que un buen día, farto de tanta literatura bueita, pensó de no escribir nian una parola més. Dende allora s’adedica a l’arte de cautibar o silenzio en todas as suyas manifestazions cutianas. Ha ganau bels premio per as suyas perfomances.

Cuan m’ascuito nunca no me siento dizir cosa coderén. Talmén per ixo escribo. Ta tirar-lo de yo. Perque abentar as parolas en a fuella de papel ye como apedecar-las: un escanso, l’eterno escanso an tot ye endescutiblemén coderén.

As zinglas d’a mia memoria m’han portau enta ista luenga que amaga más purnas en o calibo d’o que o pueblo que encara a fabla, e o que ya no a fabla e mesmo a disprezia, pueda pensar-se-ne. Nomás cal aguaitar por a plegada d’o Dante que escalibe o fuego e rebelle e ennoblexca as suyas formas. Iste sebastianismo pessoano, mito nazionalista metamorfosiau en literario, aduya a paganos como yo a enzetar un triballo terne e cutiano, de begadas solenco, por a trasfigurazión d’o mito en reyalidat. No importa si triunfamos porque ni a posteridat ni garra inmortalidat nos asperan. A cursa que diya a diya endrezemos será a unica recompensa. O dixó dito Machado: caminán, no bi ha camín, se fa camín en marchar.

Un esbol de follas

an amagar-me-ne,

que d’o tuyo ubago

no cal crosidar-ne.

O cucut en a zierzera

ha olbidau lo camín,

e nomás canta e canta

ta no remerar a fin.